थुगुसिया नेवाः देय् दबूया तःमुँज्या बलय स्वनिगल् दुने च्वपिन्सं स्वनिगपिने च्वपिन्त विरोधी कथं स्वया च्वन धैगु ख न वल । थ्व तसकं दुर्भाग्यया खँ जुल । देय् दबूया तःमुँज्याय् नायः पदय् उम्मेदवारी बिइत तयारी याना च्वना दिम्ह पवित्र बज्राचार्य नाप राजेन्द्र शाक्यजु उज्यालो ९० एफएमया नेपालभाषाया ज्याझ्व लहनाय् याना दिगु खँल्हाबल्हा ।
१. "स्वनिग पिने च्वपिनि तँ पिहां वगु इमित बांलागु बन्दोबस्त याना मबिल धका खः । गुकियाना तसंक कष्टप्रद ढंग इपिं च्वनेमाल । स्वनिग दुने च्वपिं तँ पिहां वगु इस्यु मेगु हे दु, थन उम्मेदवार जुवपिं मध्ये छगु पक्ष संघीयता पक्षधर व मेगु पक्ष संघीयता विरोधी धका पम्प्लेटय् छापेयाना पिकयाबिल ।"
२. "दक्को सिवे तधंगु खँ धैगु नेवाः तय दुने एकता हयेगु खः । तँचाया वंपिन्त सम्झेबुझे याना हानः नेवाः देय् दबूलय् दुतहया देय् दबूयात एकताबद्ध याना यंकिगु खः । खासयाना तँ चाया वपिं मनुत, तँ चाय माःगु सु नाप धाःसा, थ्व वर्तमान कार्य समिति नाप जकः खः । अव्यवस्था याः पिंला उपिं जकः खः नि, तर इमिसं छु मथुल धासा, थ्व फुक्क गडबडया ल्यूने स्वनिगपिं धका इमिसं थुइकल, गुकियात झिसं हुइ मागु दु ।"
३. "नेवाः देय् दबू गुगु उद्देश्य अनुरुप न्ह्यावने मागु खः उकथं मन्ह्यासें देय् दबूयात छगु परियोजनाय् सीमित याना नेवाः भाय् स्यंवनेगु, बाजं स्यंवनेगु, उकि हे जकः सीमित जुयाः देय् दबू न थगु मुख्य आन्दोलन त्वता वंगु झिसं खना च्वना । थ्व ईलय नेवाः स्वायत्त मंका संघर्ष समिति मदुगु खसाः नेवाः देय् दबू छुँ दँ न्ह्यो हे तनाः वने धुंकुगु जुइ ।"
"थ्व गुलिनः देय् दबू न यानाः च्वनाः धकाः बय्बय् खँ त खः, व खँ ला लिपि गुथि त जिम्मा ब्युगु खसा, लिपि गुथिं देय् न्यंक हे भाय् स्यंवनेफु । छगु कथं मध्यपुर कला परिषद् वा ज्यापू महागुथि त जिम्मा ब्युगु जुसा उमिसं देय् न्यंक धिमय् बाजं स्यंवनेफु ।"
"नेवाः देय् दबू छगु राष्ट्रिय संगठनं यायेगु ज्याः थुलि जक मखु । नेवाः देय् दबू राष्ट्रिय संगठन देय् न्यंकपिं नेवाः तयत ऐक्यबद्ध याना नेवाः हक, अधिकार प्राप्त यायेगु खः, उकि धका न्ह्यचिले मागु खः ।"
"तर उकि न्ह्यमचिलिसें परियोजना धाल, उखें थुखें परियोजना हल, परियोजनाय् धेवा फुकिगु नितिं नेवाः देय् दबू थःहे न्ह्यचिला गागांमय वना भाय् स्यंवनेगु धाल, छु छु यानाः धाल । तर उकिया प्रतिफल छु ले ? थौं झिसं खनाः च्वनाः नेवाः देय् दबूया महाधिवेशन खँय भासं न्ह्याना च्वन । थ्व सिवें न्हापागु महाधिवेशन तक न नेवाभासं हे न्ह्याना च्वंगु खः । अले नेवाभाय् मथुपिनिगु नितिं हाकन खँय भासं हिकाः न्यंकिगु याना च्वंगु खः । छिकपिं सकसिंन खना च्वन थुगुसिया नेवाः देय् दबूया महाधिवेशन ला नेवाः भासं मखु फुक्क ज्याझ्व खँयभासं हे न्ह्यागु झिसं खना च्वना । झिगु नेवाः देय् दबू थगु उद्देश्यलय् न्ह्यावना च्वना कि लिहांवना च्वना ।"
Source : Rajendra Shakya, http://www.lahana90.blogspot.com . updated with the new original version.
